Wir sind Mitgliederinnen der VSG. Das ist die allerälteste Schnitzelbank-Gesellschaft, die es in Basel gibt. Die veranstalten jeweils zwei Tage nach der Fasnacht einen "Schluss-Oobe". Da durften wir auch nochmals auftreten.
Eigentlich macht die Fasnacht ja am Donnerstagmorgen um 04:00 Uhr "Schluss". Aber wann wirklich "Schluss" ist, das bestimmt jede Clique, jede Gugge oder WAgen und auch die VSG ja selber. Für die VSG war am Freitag nach der Fasnacht "Schluss". Der "Schluss-Oobe" - darum der Name, beschliesst das fasnächtliche Treiben. Alle VSG Schnitzelbänke durften an diesem Abend nochmals auftreten. Das war ganz toll. Der Moderator hat uns seine Ansagetexte, mit denen er die Formationen angesagt hat überlassen. Hier ein paar Auszüge:
Guete Oobe mini Herre, wärti Dame
Ich begriess euch in däm wunderschöne Raame
Und lueg ich in d Rundi und euch genauer aa
Augering: Ihr hännd äu e schöni Fasnacht ka
Die isch aber nonig ganz verbi, wie mi dunkt
Findet sy hütt Oobe ihre Höhepunggt
D VSG danggt mit em Schluss Oobe uff däm Wäg
Dr Frau Fasnacht für die drey wunderschööne Dääg
Dangge äu an euch alli und die andere Lüt
Fasnacht ohni Publikum - findi - das wär nüt
E Schnitzelbangg brucht Mensche wo reagiere
Wo lache, giigele und applaudiere
S schönscht für e Bangg isch, ganz schlicht formuliert
Wenn e Värsi sitzt und d Pointe funktioniert
Und e Pointe dörf me, das wird viel vergässe
Denn nit numme am gröschte Lacher mässe
E Pointe ka äu denn e gueti Pointe syy
Wenn sie trifft, viellicht äu weh macht, hindedry
Und was ich alles luschtig find und ab was ich lach
Das isch wie immer kompletti Aasichtssach
S git verschiedeni Menschen vo do zum St. Alban Tor
Gnau so vieli Arte gits äu, vo Humor
Humor isch wie Unterhoose sone Ding
Dr eint het keini, dr ander lieber e fiine String
Eine mag's wullig digg e andere Syntetisch
Dr eint will's friwohl dr ander ästhetisch
Was ich dodermit eigentlich will sage
D VSG Bängg dien alli „Unterhoose“ trage
Dr Humor für d VSG im Vordergrund stooht
Alli gähn ihr Beschts, dass dä nit in d Hoose gooht
Als ältischt Gsellschaft syt 1906 aktiv
Isch d Verantwortig gross , viellicht sogar massiv
Syyt 117 Joor präsentiert in Basel d VSG
Traditionell tolli Bängg syt eh und je
Nüt z sueche hän Zuefall und Eventualität
Sehr wichtig sinn d Konstanz und Qualität
Scho Wuche vor em "Morgestraich vorwärts Marsch"
Als Bänggler zumene "Bangg-Check" fahrsch
Dört wärde d Värsli aaglost und derno analysiert
Und vonere Jury beurteilt und kritisiert
Und wie me das unter Bänggler sehr guet kennt
Het sich nach drei Daag dr Värsli-Spreu vom Weize trennt
Drum freuts mi für uns alli speziell für unsri Gäscht
Dir höret vo dr VSG hütt nur s Allerbescht
Nur ei Bangg dä isch leider hütt nit do
Dr Hampe vo Kleihünige ka Kleihünige nit verloo
Er het immer tolli Värsli, isch e Liebe und e Nätte
Aber leider hets ihn vor dr Fasnacht scho ins Bettli gjätte
Drum het er, im Bett liegend, sini Värs verzellt
Gfilmt und für uns alli uf YouTube gschtellt
Und zum Uftaggt dien jetzt, live und do
Die erschte Bängg uf d Bühni koo
D Nachtschwärmer schwärme syt 34 Jöörli
Vom Aescheplätzli bis zum Rieche-Töörli
Das Joor s erscht Mool mit Sologsang statt mitenander
Will, die zweiti Stimm wiilt in de Ferie z Down Under
Derno: Basel sig nit so Hundefründlig
Wurum? Das isch sehr unergründlig
Denn ohni Leine, bälle si syt 20 Joor für d VSG
Dr Bäfzgi, ohni Muulkorb überall gärn gsee
Nach de Nachtschwärmer und em «Wuff-«Wuff»
Goht denn s Källerdüürli uff
S Källertiirli wo’s scho syt 5 Joor git
Syt 2 Joor machts übrigens bi dr VSG mit
Bim Källertiirli merkt me gli, das gooht nit lang
Sini Pointe kömme immer durch dr Hauptigang
Dr näggscht Bangg isch ein wo gärn blaggiert
Vom Örgelispiiler und eme Helgeträger schön flankiert
Vor 16 Joor het er sie allererschte Uftritt ka
Uf em Schiff. Do sig schints e atrunkene Maa
Ufgstande und heig vor ihn anekörblet, me könnt motze
Derby isch dr Blageeri alles andere als zum…
Und scho 23 Joor isch sie aktiv derbi, bi dr VSG
D Kaffi Dante het scho sehr viel erläbbt und gseeh
Zu allem e Meinig, jedes Ereignis das het bi ihre platz
Me könnt grad meine, sie läsi us em Kaffi-Satz
Und derno kunnt e Bangg, äu er scho länger unterwägs
Mit gschliffne Sprüch, Pointe und träfe Gags
D Schnapsbagge isch hochprozäntig, dasch wohr
Syt 20 Joor, 100-prozäntig im Humor
Echo vom Säntis syt 5 Joor für d VSG uf d Pischte goot
Er het vor 17 Joor agfange, quasi als «Exot»
Will, er schwärzt syt Geburt und das perfekt
«En schöne, sadde, Thurgauer-Dialeggt»
Im Name Bajass und Omega isch s Wort MEGA drin
Klar dass die beide syt 2005 äu mega sinn
1986 im Wölflilager kenne glernt als Kinder
Singe si syt 18 Joor als Pfadi-Finder
Zum Schluss mit Schuelsack kömme no zwei Goofe
Und bringe uns us Kindersicht ihri greimte Strophe
Vo spitz bis fräch in Ringelsöggli
S zweit Joor bi dr VSG: S Elfi-Glöggli
Wir freuen uns schon jetzt auf die Fasnacht 2024!
Euer Elfi-Glöggli
Kommentar hinzufügen
Kommentare